विराटनगर । उच्च शिक्षालय तथा माध्यमिक विद्यालय संघ नेपाल (हिसान) का केन्द्रीय उपाध्यक्ष भेषराज पोखरेलले सरकारले ल्याउन लागेको शिक्षा विधेयक जस्ताको तस्तै पास गरिए देशभरका २ लाख निजी स्कुल बस सडकमा तेर्स्याएर देश ठप्प पार्ने चेतावनी दिएका छन् ।
विधेयकको विरोधमा विराटनगरको देवकोटा चोकमा आयोजित कोणसभालाई आज सम्बोधन गर्दै उनले निजी क्षेत्रको लगानी, योगदान र संवैधानिक अधिकारमाथि सरकारले कुठाराघात गर्न खोजेको आरोप लगाएका हुन् ।
आफ्नो आक्रोशपूर्ण मन्तव्यमा उनले २०४७ सालको संविधानले नै निजी क्षेत्रलाई कम्पनी ऐनअन्तर्गत रहेर नाफा कमाउन र राज्यलाई कर तिरेर सञ्चालन हुन दिएको अधिकारको स्मरण गराए । ‘त्यही बहुदलले ल्याएको संविधानले हामीलाई बाँच र बाँच्न देऊ भनेर जिम्मा लगाएको होइन ?ः आज त्यही व्यवस्थालाई समाप्त पार्न खोजिँदैछ,’ उनले भने, ‘अहिले अँध्यारो कोठामा बसेर ऐन बनाउने सांसद र नेताहरूलाई अक्षर चिनाउने र ज्ञान दिने यिनै निजी विद्यालय हुन् भन्ने कुरा नबिर्सन म चेतावनी दिन चाहन्छु।’
उनले राजनीतिक दल र सांसदहरूलाई कडा शब्दमा चुनौती दिँदै भने, ‘एकचोटि ऐनामा आफ्नो कालो मुख हेर्नुहोस्। यदि यो ऐन पास गर्ने दुस्साहस गर्नुहुन्छ भने, ए सांसदज्यूहरू, ए राजनीतिक पार्टीका झोलेहरू, हामीले विध्वंस गर्दैनौँ, तर देशभरका दुई लाख स्कुल बस सडकमा तेर्स्याएर देश ठप्प पार्नेछौँ ।’
आन्दोलनको स्वरूपबारे थप स्पष्ट पार्दै उनले भने, ‘हामी प्रतिशोधको आन्दोलन गर्दैनौँ, तर हाम्रा गाडीहरू तेर्स्याएर र स्कुलका सामग्री सडकमा पछारेर आफूलाई नै हानि पुर्याएर विरोध गर्नेछौँ। त्यसपछि हामीलाई सम्झाउन नआउनुहोला।’
सरकारको नीतिको आलोचना गर्दै उपाध्यक्ष पोखरेलले नेपालका १६० वटा नर्सिङ कलेज बन्द गराएर भारतको सीमावर्ती क्षेत्रमा खोल्न बाध्य पार्ने अदूरदर्शी र नालायक राजनीतिक नेतृत्वले नै अहिले शिक्षा क्षेत्रलाई पनि त्यही अवस्थामा पुर्याउन खोजेको आरोप लगाए । नेपालभरिका स्कुल बन्द गराएर हामीलाई पनि बोर्डरमा गएर स्कुल खोल भनी धकेल्न खोजिँदैछ, यसमा हामी सचेत छौँ,’ उनले भने ।
उनले यो आन्दोलन कुनै हड्ताल वा बन्द नभएको तर माग पूरा नभएसम्म र निष्कर्षमा नपुगेसम्म निरन्तर चल्ने स्पष्ट पारे ।